عام جديد .. أحلام كبيرة ... إمرأه عظيمة

انقطاع طويل والله عارفه لكن توني خلصت اختباراتي . كان شهر مليان بالاعمال والضغط المستمر الى درجه حسيت اني راح افقد سيطرتي.
حبيت اكتب اليوم لانو راح نبدأ سنه جديده للكل من مدارس وجامعات ، وكل سنه لازم تبدأ نخطط لها بكل الطرق.




قبل كل شي لازم يكون عندك الاحساس انك كائن عظيم ما خلقه الله مثل بقيه المخلوقات الا لينجز مهمه كبيره في هذه الأرض بعد عبادته سبحانه وتعالى.
هل تبغي تكوني كغيرك من البشر .. راح تقدري وبسهوله تامه ومافيها اي تعب ابداً.

عندك حلم لازم انك تحمينه ، ما تسمعي لاحد انك ما تقدري.... تبغين شي!! إسعي له.
خلي حلمك واقع.. تخيليه في كل وقت ...
 ولا اسهل ان السلبيات تفكري فيه .. ولا اسهل انك تتذكري ماضي لك وما قدرتي تسويه .. ولا سهل ان الناس يحبطونك ... فلازم انك ترجعي وتحاولي وتحاولي تتخيلين نفسك بقوه وايجابيه وتقولي انا اقدر اسويه.. انا اقدر اسويه .

عارفه انك في كثير من البنات تقول اش الفايده !! اش الفايده من التعب وبعدها محد يقدر !!... طيب انا اسأل وين طعم الحياه من غير تحدي ؟؟ من غير التخطيط ؟؟ من غير الوصول للحلم ؟؟

بعد هذا إسألي نفسك  ايش هو هدفك ؟؟ اش تبغي تصيري ؟؟ كبيرها وصغيرها ؟؟ هدف واحد ..
لا تكثر الاهداف والاحلام ركزي على شي وحيد...
أبغي تكوني ام مثاليه ؟؟ طالبه نابغه ؟؟ مديره مكتب قائده يشار لها بالبنان ؟؟تاجره من بضائع صغيره الي اسم كبير في عالم التجاره ... ليش لا 
حلم وحيد تعيشي عليه حياتك ... نبدأ من الآن 

لا تفكري بعد ما اخلص هذي الشغله .. او بعد ما اسدد القرض الفلاني .. او بعد ما يكبرو اولادي ...
لا
ابدئي من الآن .... الآن .. 

القاعده الوحيده هي سوي اللي تقدري عليه الآن ولا ترضي بالقليل ....
 كثير من الناس ما يبغون يغيرو روتينهم ... يخافون من المجهول .....
كوني الوحيده اللي تقولي انا مو انسانه عاديه ..... 

ركزي في هدف وقولي بأسوي اكثر شي .. مو باسوي اللي علي ...
لا فكري كيف تقدري تسوي اقصى شي عندك 
اذا الموضوف يحتاج تذاكري .. ذاكري ... ذاكري كان محد في الدنيا راح يختبر الا انتي ... 
تبغي تصيري تاجره ... خططي .. اجمعي الاجابيات حولك ... 

القبور مليانه بالامنيات اللي ما تحققت ... كوني من الناس القليلين اللي حققوها ... لا تقولي ظروفهم كانت احسن ... صدقيني كانت ظروفهم اسوء وقرروا يغيروها إلى الاحسن 

كيف نتغير ؟؟؟ 

لازم تتعلمي كيف تحبي الحياة... لما تحبي الحياة راح تتوجهي بشكل فوري بكيف تخلي حياتك افضل ولها معنى.. حب الحياة بدايه كل شي 

هدفك تحددينه بوضوح ... وكل اللي عليكي ٣٠ يوم 

٣٠ يوم تطبقي أعلى ما عندك وافضل شي فيكي ... في هالثلاثين يوم راح

١- تقولي لنفسك بأكون الشي اللي افكره عن نفسي ... دائما فكري بإيجابيه.. ان كل شي بيصير لك كويس 
٢- تخيلي نفسك وصلتي للهدف وكيف ان حياتك بتكون .. خلي الخيال هو رفيقك قبل النوم ...وانتي في الطريق للجامعه .. حتى في وقت فراغك
٣-ركزي في هدفك .. كل ما لقيتي نفسك بديتي تطفشي تاجيكي إشارات سلبيه ... تذكري هدفك وليش تبغينه بقوه ...
٤- وفي الأخير العمل ... العمل ... العمل ... مافي شي ياجي ببلاش ...

٣٠ يوم عمل وبعد ٣٠ يوم قيمي نفسك ...إش تطور فيكي ... ايش اللي ظل زي ماهي وليش ؟ ... وتبدأي ٣٠ يوم جديده بطرق جديده وافضل لهذا الهدف اللي ما راح يتغير .. وفي نهايه السنه راح تشوفي التغيير الجذري

في الأخير الإيمان بكل جوارحك انك ما خلقتي سدى .. وانك مختلفه عن البقيه .. وهذا الاختلاف راح يميزك طول العمر ..راح تلاقين طريقك.. وأسلوبك في التميز 

ان شا الله كان لكتابتي ولو الفائده البسيطه لكم .. هذي قطره من محيط عظيم للنجاح والتميز .. اذا بدأنها بالإيمان .. بعدها بتلاقي المقالات والكتب عديده لارشادك على طريقتك انت الخاصه