عربيه يا عربيه

مع انها أول طفله لي إالا اني ما اشتريت عربيتها الا لما صارت ٦ شهور .. كنت حابه تظل بالبيت قدر الامكان لين تكبر حبتين ..

 جا وقت اختيار العربيه.. وكانت أممم الصداع .. قعدت افكر اش احتاج منها وايش ابغاها توفر لي ..

 من هنا بدأت رحله اختيار العربيه .. اعرف فيه كثير اشتروا إلى اربعه حتى وصلو للعربيه المناسبه .. عني انا قلت لحالي راح اشتري وحده وبإذن الله تكون الأفضل.

طيب حطيت طلباتي 

١- حجمها معقول .. لقيت كثير من الأمهات تقود مكوك فضائي هههه اعرف انها اختارته عشان يكون مبحبح للطفل بس برضو مزعج في الأماكن العامه 

٢- تطوى بخفه وسهوله .. يا كرهي للعربيات اللي تقعد تفكها يومك او تحوس وانت ترجعها وتحتاجين شخص ثاني يساعدك فيها .. يازين اللي بسرعه تنفتح وترجع.

٣- انو الطفل يقدر ينام فيها ... من جد ارحم الاطفال اللي في عربيات ما ينزل ظهرها وينامون وهم جالسين .. لازم الكرسي ينثني ولو حبتين عشان ينام البيبي وهو مرتاح 

٤-ما همني السعر صراحه لأني استثمر في عربيه ابنتي .. بس كمان ماهي شغله بزوطه ما راح اشتري ب ٦ آلاف معليش كثيره والله لو انها تمشي من حالها ومتوصله بأفكاري كمان .

الصراحه ما رحت المحلات ولا دورت ولا فرفرت ... دخلت النت وبدأت اشوف العربيات اللي ينصحوا فيها الامهات وكمان في مواقع تبيع العربيات ويشرحوا عن كل عربيه حتى اليوتيوب ما يقصر .. طبعا بحثي كان للمواقع الاجنبيه لكثره الأمهات اللي يكتبو عن هذي الاشياء... حددت كذا عربيه وبعدها شفت وين تنباع ووقع الاختيار على طن طن طننننننن

 BUGABOO BEE

اعجبتني كثير كثير خفيفه سهله الفتح و القفل عمليه وكمان مريحه لبنتي صح سعرها يمكن فيه افضل منها بسعر ارخص بس انا وجدت انها تناسبني .تقدرو تلاقو فديوهات كثيره باليوتيوب عنها . نفس شركه Bugaboo عندها خيارات كثيره .

بس حابه أبين شي واحد انا غفلت عنه ولقيت كثير ينسونه .. اذا طفلك كبير او سمين لا تنسي تشوفي في العربيه مساحه الكرسي وانه طويل كفايه عشان رجوله ما تنزل او يكون لها سند .

هذي رحله العربيه ..إن شا الله أكون فدتكم ....