لكن عندي شعور بالذنب عظيم اني ما رضعتها الا شهرين !! اعرف طبيبه وما رضعت بنتي رضاعه طبيعيه للأسف نعم.
وانا حامل قررت ارضع طفلي سنه كامله من حليبي ولا غيره بس للاسف ما خططت للموضوع كويس، عشان كذا كتبت هذا الموضوع يمكن احد يستفيد من تجربتي .
اول شي النيه بقوه وصدق عارف اني نويت واخلفت بس المره الجايه نيه وتخطيط تمام.
الاشياء اللي لازم تنعمل قبل ولادتك ولا تقولين لسا عندي وقت . المشكله الولاده مالها موعد وبعد الولاده الدنيا حوسه ومحد حيجيب الاغراض زي ما تبغينها .
المهم نبدأ بسم الله
- جهاز شفط للحليب
اول ما تولدي ما راح يطلع الحليب من اول يوم بس بعدها بكم يوم راح يطلع بكثره حرام يضيع حليبك سدى فلازم آله شفط تخزني حليبك خاصه اول ايام فيها كل الفوائد
اذا انتي ام عامله او حتى ربه منزل راح تحتاجين ايام او اوقات للراحه وتخلي حد يرضع عنك ف من الافضل تستثمري بآله كويسه لك وللزمن
لا تقولي بعد الولاده من اخر كم شهر جهزي واقرئي كيفيه الشفط وحفظ الحليب وطريقه استعمالها راح تدعي لي
انا استخدمت جهاز من فيليبس
تستخدم للثديين بالأول شفطت الاثنين في وقت واحد بس تعبت وانا اشيلها بعدها صرت استخدم وحده بعدين الثانيه وقت ثاني
في هذا الشي الغريب يبيعونه بالنت هل هو مفيد او لا ؟؟؟ ما ادري
ممكن كنت باشتري للثدي الواحد مثل هذي طبعا في شركات ثانيه مثل ميديلا واميدا ود براون على حسب المتوفر عندكم في المحلات
- ادوات التخزين
طبعا دام صدرك يطلع حليب اشفطي في اوقات الفراغ عشان تخزني انا افضل هالنوعيه لانها ما تاخذ مكان مثل الكاسات
هنا انا طحت في المطب ههههههه والله جد استخدمت الرضاعات اللي كانت موجوده في العده وهذا اكبر غلط وخرب علي الخطه كلها وما عاد قدرت ارجع الامور صح
الرضاعه لازم تكون مثل حلمه الام تماما مثلها زي هذي
على قد ما نقدر تكون حلمه الرضاعه صغير الهدف ان الطفل ما يتعود على الرضاعه السهله من الرضاعه العاديه
رضاعه الصدر يبغاله مص قوي وما يتغير على الطفل بين شكل الصدر والرضاع بعد فتره راح يرفض الطفل الصدر لان الشغله متعبه وما يطلع الحليب بسهوله زي الرضاعه العاديه … فهمتو الغلط بليز قولو ايوا :)
- تجهيز الصدر للرضاعه
بعض البنات حلمتهم داخله لازم اذا قرب وقت الولاده تدهن الصدر والحلمه بزيت زيتون وتحفز الحلمه انها تطلع مع الوقت لين بعد الولاده الصدر بيكون جاهز للترضيع
- وساده ترضيع
لازم لازم لاااااازم منها راح تريح ظهرك وتسند البيبي وتخلي الرضاعه اسهل بكثير بس تحطي الطفل وهو يمسك زمام الامور وبعدين اذا كبر الطفل لها كذا استخدام وراح تكتشفيها
- حماله للمرضع طبعا اكيد منها مع وسادات القطن لمنع تسرب الحليب وطبعا حريم لترطيب الحلمه بس زبده الكاكاو او جوز الهند مررره كويسه
- تطبيق من الجوال لحفظ اوقات الرضاعه ومدتها كثيره على الآب ستور والاندرويد
- مسانده من الاهل والمستشفى.
خذي وقتك تكوني مع اهلك او يكون زوجك معاكي او العامله اي احد يساعدك عشان تنامي وقت كافي وياخذو الطفل منك يشجعونك عالرضاعه من صدرك لان الشغله متعبه في البدايه بس مع الوقت تبدا تسهل الامور .
اطلبي في المستشفى الممرضه توريكي كيف ترضي او امك او اي احد لا تخجلي من طلب المساعده
-الاكل الصحي والشرب
اشربي كثير من الماء وكلي اكل صحي اقري عن الاشياء اللي تزيد تدفق الحليب من البدايه وحضري لها
اخيرا المهمه ماهي سهله ولكن مفيده لطفلك بإذن الله وفيها رابط جميل بين الام وابنها ما يتعوض بعدها . خففي على نفسك لا تضغطي على حالك الامور بتمشي بهدوء تام ولا تنسي تطلبي المساعده من الغير . مافي اجمل من شعور الطفل يدور علر صدر امه ويرضع بحنان يااااه انا تعبت :(
هذا موقع يبيع كل شي للطفل من جد استفدت منه بس يبغالك بريد خارجي من ارامكس http://www.diapers.com/
انا متاكده ان كل الاشياء موجوده في محلات مذركير سنتربوينت تشيكو او حتى الصيدليات الكبيره
يارب يارب احد يستفيد وانا مقرره ان طفلي الثاني اطبق كل هالامور باذن الله.
المشاركات
أضيف لها...استخدام كريم مرطب لحلمات الصدر و يعالج التشققات ..لأنو في الأيام الأولى المولود يكون على صدرك طول الوقت وهذا يجرح ويشقق الحلمات...أنا في مرحلة معينة صرت أبكي من الألم وكنت ح أستسلم خلاص .. :(
ردحذفأيضاً لا تعطي مولودك رضاعة أو مصاصة لأول أسبوعين أو ثلاثة أسابيع .. لأنها تسبب ارتباك الحلمة وبالتالي يرفض صدرك..
أسجل إعجابي بمدونتك الجميلة ..